Nadale  (Un po’ di Bibbia )

1
Avveràdas si sun sas profezias
peccadore non vivas in tristura
su Paradisu est in solennidade
Giona, Daniele e Isaias
in libros de profetica iscrittura
iscrittu ana in s’antighidade
s’Augusta suprema Trinidade

2
A nois regaladu at una gema
sa Trinidade Augusta e Suprema
imbiesit su fruttu benedittu
Giona e Daniele e Isaias
in libros de profetica iscrittura
dae s’antighidade ana iscrittu
Israele non vivas pius afflittu

3
C’has logradu su latte cun su mele
prus afflittu non vivas Israele
ca ses bintradu in sa terra ‘e Cana
Giona e Daniele e Isaias
in libros de profetica iscrittura
dae s’antighidade iscrittu ana
bessida est sa difesa umana

4
Deus at postu manu a cuss’impresa
bessida est sa umana difesa
Cristos s’es de sa terra fattu amigu
pro dissipare su serpente antigu
s’imperadore at bettadu unu bandu
ch’a Betleme s’esseren presentados
tottus a vintighimbe de nadale

5
Maria e Giuseppe a su cumandu
a Betleme si suni incaminados
pro cumprire a s’ordine imperiale
ostèra no agattan ne locale
ca fin prenas de zente furistera
locale no agattan ne ostèra
a un’istalla andesin pro dormire

6
Maria e Giuseppe a su cumandu
a Betleme si sunu incaminados
S’ordine imperiale pro cumprire
in cust’istalla deviat naschire
su fizzu de sa Virgine Maria
in cust’istalla naschire deviat
su veru Deus coment’e s’omine

7
Maria e Giuseppe a su cumandu
a Betleme si sun incaminados
pro cumprire s’imperiale ordine
umanidade lassa su macchìne
ammitti a Cristos cun umilidade
lassalu su macchìne umanidade
c’a mesu notte su Verbu Divinu

8
Naschidu est in s’istalla che meschinu
appenas nadu su Divinu Infante
l’alidesin sos duos animales
e in s’umile pazza l’han distesu
appenas nadu su divinu Infante
si cumparzesit un’astru brillante
e abbertas sas portas eternales

9
Innos celestes, sonos s’hat intesu
immensas legiones hat discesu
cun suaves cunzertos e canzones
discesu at immensas legiones
annunziende sa sa paghe a sos bonos
apenas nadu su Divinu Infante
li cumparzesit un astru brillante

10
S’at intesu innos e celestes sonos
sos pastores intesu hana sos tonos
chi fin de Paradisu sos clamores
cumpresu hana sos tonos sos pastores
s’angelu li sindicat inue este
appenas nadu su divinu infante
si cumparzesit un astru brillante

11
E abbertas sas portas eternales
s’hat intes’ innoghe sonos celestes
cust’albòre nos calmat sa tempeste
e nos riscaldat d’eternu calore
sa tempeste nos calmat custu albòre
isfidat e cumbated a duellu
de s’inferru ogni ispiritu ribellu

INDICE GIOVANNI ATZORI

  INDICE SOS POETAS

  INDICE SITO