Ses Bella Idumagiore fiorente,
de me diciosu su logu natiu,
a pes d’una collina, e unu riu
ti colat a sos  pes casi rasente.

Bides su Tirsu car’a Oriente
mama de zente onesta, totu briu;
abas bonas e friscu as in s’istiu
e in s’ijerru su clim’as callente.

As frutas bellas, saltu onu po trigu
bestiamene, orzastros e olias,
binzas meda e piantas de ortigu.

Antiga fonte fis de poesias
e como proseghinde s’estru antigu,
mancari lanzos possedis sos mios.

E tenes puru Tumbas de Giagantes,
Tantos Nuraghes e, milli abitantes.