Bidumajore est sa gema incastrada
in sa valle Tirasana, no est neu,
comente cun limbazu ostil’e feu
in su soneto tou l’as giamada.

Rica, fertile, sana e situada
front’a fronte a su Lagu ‘e Omodeu;
cun ortos chi li dan fruta e recreu
mentres sezzit in s’umbra ossigenada.

At abas cun sas venas in sas rocas,
sempre  friscas e puras bastantes
a sos milli operosos zitadinos.

Est rica de cussorzas e giardinos,
de nuraghes e tumbas da zigantes
e galanas possedit sas piciocas!