Bella, santa, divina e maestosa
ses, subra su Nuraghe altisfidante
de sos seculos s’ira ispaventosa,
celeste insigna de Gesus amante.

Suta sas alas tuas pietosa
custodi de sa idda ogn’abitante
e sias in s’altura, luminosa
guida pro s’istracu viandante.

Da-e cussu ciclopicu Nuraghe
monumentu de mortas civiltades
sa idda nostra beneighe, e faghe

ch’a tie unidos che fizos e frades
in nois regnet sovrana sa paghe
fin’a sa fine ‘e totu sas edades