Sa festa de su inu su trinta e Santandria

Su trinta e Santandria, a Santandria
Tottu unidos , li faghimos onore,
cun binu onu chi paret licore,
cun sos profumos de sa terra mia

ponet sa prima tazza in bonumore
sa segunda ti donat allegria
a sa terza diventas cantadore
e ti faghet cantare in poesia

cun fide cristiana e riguardu,
onoramos s’apostulu divinu
faghinde festa bella fin’a tardu,

su poeta po meritu e su inu,
daghi che finit sos versos in sardu
cantat in ispagnolu e in latinu…