Sa Rughe

Bella, santa,divina e maestosa
ses, subra su Nuraghe altisfidante
de sos sèculos s’ira ispaventosa,
celeste insigna de Gesùs amante.

Suta sas alas tuas piedosa
custodi de sa idda ogn’abitante
e sias in s’altura, luminosa
guida pro s’istracu viandante.

Da-e cussu ciclòpicu Nuraghe
monumentu de mortas civiltades
sa idda nostra beneighe, e faghe

ch’a tie unidos che fizos e frades
in nois regnet sovrana sa paghe
fin’a sa fine ‘e totu sas edades