Deo t’appo connottu dae minore,
Cando sos primos passos indecisos
Fis ponzende in sa vida Salvadore.

Ei sas tuas brullitas e risos
Chi ti abbellian sa fisonomia,
Sa fronte alta, sos trattos precisos.

Fis tue preferidu in cumpanzia,
E sa idea tua genuina,
De sos cumpanzos bonos fis sa ghia.

Fis tue animadore in sa nuina
Cando cantias cun boghe sonora
Sa laude de su chelu a sa Reina.

Giovanu de sa vida in s’aurora
Chittulanu pigadu ti has sa via,
De idda tua ses bessidu a fora.

Indossadu has su pannu de politzia
Affrontas de s’iscola sa chimera
Fattende in donzi proa valentia.

Cun bellu garbu e cun bona manera
Ti ses distintu in donzi campagna,
Has fattu una brillante carriera.

Poi cun fide e cun zelu in s’intragna,
Cunsagrende in s’altare s’unione,
T’has leadu una dechida cumpagna.

A su tribagliu has tentu affezione.
Prezisu e sempre prontu a su dovere
Fin’a sa meritada pensione.

Oe Tore! Non faghede a li creere,
Tottus pianghere podimos ebbia
Ca ti hat giamadu su Divinu Mere.
Ite pena. Ite affannu. Ite angustia!