|
Seo naschidu su noe de S'ant'Andria
primogenitu Mureddu in terra Austesa.
Mi perdonene sos mannos 'e giuria
si avanzo cun arreu custa pretesa:
cherzo ischire si custa mia poesia
est'in gradu de affrontare sa contesa;
e prego sas Tres Forzas in d'Una
chi m'assistene e mi dian fortuna.
O Fortuna cantas bortas ses giamada
cun manos zuntas in pregatoria,
dae nois poberos mortale invocada
cun graves paraulas de oraria.
Ma l'isco 'ca ses zega e non bind'ada
lamentos chi t'indichene sa via.
Chie sos basos tuos ada a rezzire
mancu tue, timo l'asa a ischire.
Ma forzis una orta l'asa intesu
s'ardire de unu coro purpurinu:
forzis tanta audacia a' tentu pesu
'ca ses surda po chie si da meschinu.
Su olu po un'istella appo intrappresu
e dae Chelu la porto intro su sinu.
O fortuna ses motivu de recreu
'ca dae Chelu leadu appo ingrazeu
|