Alta, solenne subra cust’altura
Impones austera su rispetu,
mirende su paesagiu cun diletu
cantu tenet de bellu sa natura.

Dominende collinas e pianura
Esprimes pius altu unu cuncetu:
S’amigu ‘onu si bidet in s’apretu
E no contat volume de figura…

Guasi divina in sa divinidade
Miraculu de Antenna generosa
Ses virtude de fide e caridade; 

Tue ses alta e dominas maestosa
Mònitu a s’intera umanidade:
Paghe! Solu sa Paghe est vitoriosa.