Tue, restada unu fulgore eternu
faru de lughe, mistica poesia,
tra Chelu e Terra luminosu pernu
a collegare a Tie ogni via.

Da’ su Dughentos, Tue in custu situ,
serenamente vigile Sovrana,
bides zente mirende s’infinitu
amaliada da’ un forza arcana

A Cabidanni in s’istade ardente
preces  e cantos animan s’istrada;
pro te s’afollat tota custa zente
ca ses in-d ogni coro venerada.

In d'ogni coro b’est sa brama vera,
su fervore costante ‘e ti amare;
Salve Reina, sa rinnovad’ispera
pone  in chie ricurret a pregare.

Salve Reina, mater generosa
lughente  de virtude, de candore;
Tue ses Mama, Fiza e ses Isposa,
ses Font’Eterna de s’Eternu Amore.

Tue, restada subra sas tempestas
bella, amorosa pront’a consolare,
cunfort’umanu eternamente restas
in su niciu doradu de s’altare.