A pes de tres nuraghes protetores
in-d un’adde sulcada da’ unu riu,
Aidumajore su logu natiu
at sorgentes de limpidos umores.

Birde in beranu est d’erbas e laores,
de ispigas brundas prodiga in s’istiu;
s’atonzu at binos chi ponen in briu,
finzas d’ijerru at frutos e fiores.

Deditos sun sos suos abitantes
a sas culturas, greges e armentos
chi tantos frutos prodigan bundantes.

S’arcanu de sublimes sentimentos,
de melodias e musas amantes,
esprimen cun nostalgicos acentos.