Cun grande pena e dolore,
sentimentu e agonia,
oe cumbidat Maria
a piàngher su Salvadore.


Bennid’est pro cumbidàre
Sas chi sun’isconsoladas
chi cun Issa tott’umpare
fèttan su tèu aggiustadas
bènzan cuddas tribulàdas,
e bìdan custu terrore.
oe cumbidat Maria….

Bènzan sas chi lis hat mortu
fìzos o atera zente,
e piàngan sena cunfortu
cun Maria sa dolente,
 bènzan como de presente
cun sentimentu e dolore.
oe cumbidat Maria….

Cominzàde Bois, Signora,
a nàrrer sa poesia
a piàngher cust’aurora
de sos chelos allegria,
ch’in mesu e tanta agonia
ispirèsit cun dolore.
oe cumbidat Maria….

Cun Maria benedetta
Fèttan su tèu aggiustàdu,
ca si bidet tantu afflitta
pro s’Anzone Immaculadu,
ca l’incontrat ispiràdu
sena vitale vigore.
oe cumbidat Maria….

Bortet sos ojos signore
e miret sa triste mamma
ch’est brusiànde in su furore
de ardentissima fiamma,
rispòndat pro chi lu giàmat
e iscùltet su clamòre.
oe cumbidat Maria….

Ite disgustu l’hat dàdu
ca no li nàrat niente,
pro chi l’incòntrat corcàdu
in sa lettèra presente,
pro cussa maligna zente
castigàda cun rigore.
oe cumbidat Maria….

Ti supplico, anima mia,
chi mi chèrzas faeddàre,
s’incontràre Ti podìa
meighìnas de ti dare,
si Ti podìa sanare
a Tie Fizu e Signore.
oe cumbidat Maria….

Nàra ite sunt sas feridas
chi Ti bìdo già mortales,
in cussas càrres lughìdas
senza causare màles,
pro sas culpas chi sunt tales
de s’omine peccadore.
oe cumbidat Maria….

Si risultere in s’intentu
de Ti blandàre sa pena
tia usare s’unghèntu
de Maria Maddalena
pro curare cussa vena
Chi segadu han cun furore.
oe cumbidat Maria….

Sènde Tue, Re potente,
Fizu de s’anima mia,
proìte tantu dolente
lassas afflitta Maria,
de sos Chelos armonia
E de su mundu fattòre.
oe cumbidat Maria….

Benedittu ti siat, Fizu
su latte chi t’happo dàdu,
e mancàri cun fastìzzu
e dolore mi has lassàdu,
sias semper laudadu
tue Fizu e Redentore.
oe cumbidat Maria….