Su sabadu santu no este una die de pasu po sos Cunfrades de Idumajore, nois, sos de Santa Rughe, attobamos a sas trese a sa cresia de Sant’Ainzu po andare a boddire sa Proinca. In tempus de unu faer de rughe che semus in “Riacca”, armaos de pudatza comintzamos a segare sa proinca, occannu este tottu lìera e frorìa (no nd’epat fattu puru de abba!!). Appustis de unu pagu c’arrìbana so cunfrades de su Sennore, e issos puru comintzana a segare, in d’una pariga de oras, che prenimos duas motocarrozzellas de proinca e che dha pigamos a bidda. Sos cunfrades de su Rosariu no si sun bios, fortzis dh’ana zai oddìa a su manzanu.
Su manzanu appustis, tottu sas Cunfradias, nos tzappamos in pratza ‘e cresia a sas sette e mesu po ettare sa proinca. Sas fasches benin iscarrigadas e, cadaunu nde pigada unu matzulu e si segada a cantigheddos, finas a c’ammuntare tottu sa pratza inue appustis benit fattu s’Incontru.
Cando sa pratza ch’est tottu istèrria, si andat a sas domos de sos impreaos e impreadas e si ettat sa proinca in su lumenarzu de sa jenna, e gasi nos faghimos cumbidare su gaffè o crachi calighe de cosa.