SA CANTZONE DE SU SORDAU - Ottava Torràda 
(Risposta di Giovanni Atzori alla lettera di Salvatorangelo Vidili - clicca per visualizzare la lettera di Vidili)

1
Iscurta Signor caru attentamente
De su mese ‘e nadale a vintunu
Settantaduos de s’annu presente
M’agatto de Livorno in su comunu.

2
Retzidu l’appo e dadu m’ad  gustu
Su vogliu chi vostè m’ad ispedìdu
Ca su chi cunteniad es naschìdu
Da unu coro liberale e giustu
In ricompensa si regorzad custu
Bonu o malu comente m’est bessìdu;
C’apo perdidu s’idea poetica
Da cando so in mesu a zente eretica.

3
Da cando so in mesu ‘e custa zente
Non so in poesia pius perfettu;
Perdid ’ appo su meu dialettu
Travigande limbazu differente;
E passande sa vida malamente
A dogni isclavitudine sugettu,
Non so pius isveltu ne prontudu
Ca so torradu che santu ‘e ludu.

4
Cessados cuddos fumos galiardos
In poesia non pius sinzèru
Ca isto bindigàda e mese interu
Senza ider ne faedare Sardos,
Vivinde cun Toscanos e Lombardos
Si li penso nde morzo ‘e disisperu;
Ca sos ispassos e gustos de riere
M’ana nadu; adiosu a menzus biere.

5
Prus no intendo sa lira sonora
Sonende in cuddu monte de allegria
S’isquillu ‘e sa trumba intendo ebbìa
Chi sonad dogni die a s’aurora
E narad, prestu a terra fanteria
E in arma e bagagliu essinde fora!
Gai sa vida so passende como,
a sonu ‘e trumba mi peso e mi dromo.

6
O vida angosciosa e disperada!
Penas chi non si podene suffrire
Su esser obbligadu a ubbidire
A zente mai bida ne trattada!
Su soldadu si deved  reduire
A fagher tottu su chi non l’aggrada
E chie si presumid de astuttu
Non li mancad presone e pane assuttu.

7
Su soldadu lu pensana birbante
Sos chi non nd’an provadu su rigore;
Est unu iscrau estidu ‘e signore
Aggravadu de pesu istravagante ;
Est un’isconsoladu mendicante
Chi nessunu lu mirad cun amore ;
Mancari parzat decchidu e pulidu
Es fadigadu poveru e famidu.

8
Sa razione chi nos dana es pittica,
Finz’in cue faghimos mala vida ;
E dogni die sa suppa es cundida
De bobboeddos e cantos de tzicca ;
Finas su cane li faghed sa ficca,
Ma già che passad tra zente famida :
Cando semus de famene aggravados,
Sos maccarrones paren zuccorados.

9
Cando b’agatto calchi bobboeddu,
Imbuco a mandigare prus accuzzu ;
Serro sa ucca e ch’ingullo su suzzu,
E mi nd’affutto ‘e sa petta ‘e porcheddu
Mancari siat su brou nieddu,
Ischisittu mi paret s’abbulutzu :
Cando m’attaccat su male ‘e fiancos
Non griso ne colores ne arrancos.

10
In cantu siat pro usu ‘e su inu,
So un annu buffendelu in didale
Baccu s’amigu meu coriale
Cando m’attoppat cambiat caminu
Innantis m’istringhiat in su sinu
Ca deo lu servìa puntuale ;
Como non mi faeddad ne m’istima
Es già un’annu chi semus a prima.

11
Su cantu abbarro servinde a su Re
Dae su coro ‘e Baccu ch’isto fora,
In ue non b’ad cantigos de se
Baccu es dispreziadu e non mezorad
Ma tiu Antoni Pala cun Vostè
Beneaminos suos sunu ancora ?
De cussu tantu già nde so seguru,
Ca ue b’est Appollo Bacco puru.

12
Sas Deas de Livorno sunu bellas
Chi incantana su prus duru cristianu ;
Si mi daeren passu in sas cappellas
Deo las adorao fittianu;
Ma semper uso vivas cautellas
Pro che viver de Venere lontanu,
C’app’intesu chi sa bellesa sua
Pro su sambene umanu est’una lua.

13
Tia adorare a Pomona e Diana
E atteras chi su nomene non tratto.
Ma de Venere amante non mi fatto,
Ca cantu est graziosa es male sana
Già sun bastantes sas penas chi patto,
Faghinde su soldadu in sa Toscana
Non cherzo tantos males ammesturos
Pro isfogare macchines impuros.

14
Como non mi occurred prus niente
De iscrier in bene ne in male
A tiu Antoni Pala solamente
Li nerzat chi nd’ispetto unu signale
E si vostè m’iscriet frequente 
Deo so risponder puntuale
Tantu pro fagher sett’ o otto muttettes
No ispendo marengos ne billettes.

15
Finalmente pro grassia ‘e Deu
So sanu senza alcuna maladia,
Duas boltas costadu m’est ebbìa
Istare in ispidale a mese intreu,
Sa famiglia sua ei sa mia
Saludade fortemente a nomen meu
De poi a tiu Pala e a Marzeddu
A Medde, a Pedru Ara e a Mureddu.

16
Fino, e lu saludo cun rispettu,
So Giuanne e mi firmo a manu mia
Soldadu in sa segunda cumpagnia
De Livorno in su treighi distrettu.

INIZIO PAGINA - INDICE GIOVANNI ATZORI - INDICE SOS POETAS

  INDICE SITO

                                                                                                                        Recupero del testo a cura di MARIO ATZORI.