Sa Jobia Santa
Su manzanu de sa Jobia Santa est proinde a diluviu, e parede chi cherzat sighire po tottu die. Verso sa undighi s’iscrariat unu pagu e s’impreu de Santa Rughe calada a su cannedu de Urmos po segare sa canna noa de s’Ecce Homo. Sa canna etza benidisegàda a cantigheddos e zada a tottu sa popolazione.
Apustis bustàu verso sas duas e mesu  sos impreaos e sas impreadas de Santa Rughe attobana a sa cresia de Sant’Ainzu po ogare s’Ecce Homo.
Sos cufrades narana su  Miserere cando che ogana s’istatua e dha ponene in sas andias in pitzu de sa mesa in mesu cresia. Sas impreadas dha mudana cun rampos de   amenta, limpidedha, violas, fresias e ateros frores chi poi benin  beneittos. Bi ponene a inghiriu tottu sos Nenneres fattos de trigu e de asolu e lentiza.  Ocannu funi medas e bellos, isperamos chi siat annada ona!.
A sas trese si sonat sa campana de Sant’Ainzu e sa zente benidi a pregare s’Ecce Homo, a chie che attidi ateros nenneres a chie che attidi lumicinos.
A su sero a sas sette e mesu b’este sa missa cu su Lavabu. Su preìde samunat sos pes a doighi cunfrades, battoro de Su Sennore, battoro de Su Rosariu e battoro de Santa Rughe. Su Cuntzertu cantada su Kirie in sa missa, su Miserere ei s’Istabat Mater in sa prutzessione po che atire s’Ecce Homo a cresia mazzore. Agabàda sa prutzessione su Friore de su Sennore cumbidat a tottus in sa sala in sutta de sa cresia mazore.